លោកនាយករដ្ឋមន្ត្រី ហ៊ុន សែន បានថ្លែងព្រមាននៅថ្ងៃពុធនេះ ដល់អង្គការក្រៅរដ្ឋាភិបាលមួយចំនួន ដែលធ្វើអធិប្បាយណាមួយទាក់ទងការបើកស្រាវជ្រាវនៃក្រុមស៊ើបការណ៍ សម្ងាត់របស់រដ្ឋាភិបាល ទៅលើករណីដែលលោកហៅថា ឧក្រិដ្ឋកម្មទាក់ទិននឹងភេរវកម្មនៅប្រទេសកម្ពុជា ។
លោកនាយករដ្ឋមន្ត្រី ហ៊ុន សែន បានរាប់ឧក្រិដ្ឋកម្មទាក់ទិននឹងភេរវកម្មនោះ គឺរួមមាន ការវាយប្រហារមួយនៅក្នុងខេត្តសៀមរាប ដោយការបាញ់បេ៤០ ទៅលើក្បួនរថយន្តរបស់លោក កាលពី១០ឆ្នាំមុន ការស្រាវជ្រាវលើបណ្តាញចលនាកងទ័ពសេរីជាតិកម្ពុជា CFF នៅឆ្នាំ២០០០ និងចលនាមហានគរប្រឆាំងរដ្ឋាភិបាល នៅខេត្តពោធិ៍សាត់ ។
លោកនាយករដ្ឋមន្ត្រី ហ៊ុន សែន ៖ «អត់មានអាជ្ញាយុកាលទេ សូមទោស ហើយសូមកុំភ័យខ្លួនឯង ហើយអង្គការក្រៅរដ្ឋាភិបាលនានាដែលមាននិន្នាការប្រឆាំងរដ្ឋាភិបាល សូមកុំនិយាយផ្ដេសផ្ដាស អ្នកឯងលម្អៀងហើយ ។ ឧក្រិដ្ឋកម្មមួយមិនត្រូវបិទបាំងទាល់តែសោះ មិនថា ឧក្រិដ្ឋកម្មនោះចេញពីប្រភពណាទេ ត្រូវធ្វើទាំងអស់» ។
សូមជម្រាបជូនថា កាលពីថ្ងៃទី១៥ ខែមិថុនានេះ លោកនាយករដ្ឋមន្ត្រី ហ៊ុន សែន បានបញ្ជាឲ្យក្រុមស៊ើបការណ៍សម្ងាត់របស់រដ្ឋាភិបាល បើកការស្រាវជ្រាវករណីខាងលើនេះ បន្ទាប់ពីមានការអះអាងពីអតីតសមាជិកគណបក្សសមរង្ស៊ី ថា សមាជិករបស់គណបក្សសមរង្ស៊ីមានជាប់ពាក់ព័ន្ធនឹងករណីវាយប្រហារទាំងអស់ នោះ ៕
2008-06-18
RFA
Subscribe to:
Post Comments (Atom)
No comments:
Post a Comment