លោក ផៃ ស៊ីផាន អ្នកនាំពាក្យរបស់គណៈរដ្ឋមន្រ្តីកម្ពុជា បានមានប្រសាសន៍ឲ្យដឹងថា ការបិទច្រកទេសចរណ៍នៅប្រាសាទព្រះវិហារនោះ ដើម្បីជៀសវាងអធិករណ៍នានា ដែលអាចកើតមានរវាងក្រុមអ្នកតវ៉ាថៃ ជាមួយប្រជាពលរដ្ឋខ្មែរនៅតំបន់នោះ ហើយថា បញ្ហាចុះឈ្មោះប្រាសាទព្រះវិហារជាបេតិកភណ្ឌពិភពលោកនោះ បានទទួលការយល់ព្រមពីភាគីរដ្ឋាភិបាលថៃរួចទៅហើយ ។
លោក ផៃ ស៊ីផាន មានប្រសាសន៍ដូច្នេះថា ៖ «ខ្ញុំគ្រាន់តែដឹងថា បាតុករថៃដែលគេធ្វើដំណើរមកដល់តំបន់ស យើងក៏បានធ្វើត្រៀមលក្ខណៈដើម្បីការពារសុវត្ថិភាពនិងអធិបតេយ្យរបស់ ខ្មែរយើង តែប៉ុណ្ណឹង ហើយយើងមិនដឹងថា បិទមកពីបញ្ហាអីផ្សេងពីហ្នឹងទេ» ។
លោក ផៃ ស៊ីផាន បានឲ្យដឹងថា ការចុះឈ្មោះប្រាសាទព្រះវិហារជាបេតិកភណ្ឌពិភពលោកនោះ វាជាបញ្ហាវប្បធម៌សុទ្ធសាធមិនមានទាក់ទងជាមួយបញ្ហាទឹកដីអ្វីនោះ ទេ ៖ «ថ្ងៃនេះ នាយករដ្ឋមន្ត្រីថៃបានទៅប្រជុំព្រឹទ្ធសភាដើម្បីឆ្លើយពីសំណួរអំពី អ្វីៗដែលរដ្ឋាភិបាលថៃបានឯកភាពជាមួយរដ្ឋាភិបាលកម្ពុជាយើង ដូច្នេះវាអត់មានបញ្ហាអ្វីទេ បាតុកម្មគ្រាន់តែជាបាតុកម្មដោយឡែកនៃក្រុមមួយនៅក្នុងប្រទេសថៃ វាមិនមែនជាការសម្រេចរបស់រាជរដ្ឋាភិបាលឯណា ពីព្រោះយើងបានចុះហត្ថលេខាជាមួយគ្នា ។ ចំពោះព្រឹទ្ធសភាដែលនិយាយពីរឿងខ្លាចបាត់បង់ទឹកដី គឺវាខុសពីប្រធានបទដែលយើងនិយាយអំពីការចុះប្រាង្គប្រាសាទ ព្រះវិហារនៅក្នុងបញ្ជីបេតិកភណ្ឌពិភពេលាក ។ ហើយចម្លើយនៅដដែល ជំហររបស់ព្រះរាជណាចក្រកម្ពុជា គឺថា នេះជារឿងវប្បធម៌សុទ្ធសាធ ហើយគណៈកម្មាធិការបេតិកភណ្ឌពិភពលោក មិនមែនជាតុលាការក្នុងការសម្រេចក្ដីថា ដីនេះជារបស់អ្នកនេះ ដីនោះជារបស់អ្នកនោះ គឺអត់មានទាល់តែសោះ ។ ដូច្នេះភាគីខាងរដ្ឋាភិបាលយល់ច្បាស់ ហើយប្រជាពលរដ្ឋខ្មែរយល់ច្បាស់ តាមរយៈការផ្សព្វផ្សាយរបស់យើង» ។
លោក មឿង សុន ប្រធានក្រុមហ៊ុនទសចរណ៍ក្នុងស្រុកមួយ ឈ្មោះ អឺរ៉ាស៊ី ត្រាវែល ហើយដែលកាលពីពេលថ្មីៗនេះ លោកបានផ្ដួចផ្ដើមរៀបចំទិវារំលឹកខួបលើកទី ៤៦ ថ្ងៃដែលតុលាការអន្តរជាតិក្រុងឡាអេបានកាត់សេចក្តីថា ព្រះវិហារជារបស់ប្រទេសខ្មែរនោះ បានមានប្រសាសន៍ឲ្យដឹងថា ការបិទប្រាសាទព្រះវិហានោះ គ្រានាតែដើម្បីកុំឲ្យមានការរំខានដល់មិត្រភាពប្រទេសទាំងពីរ កម្ពុជា-ថៃ តែប៉ុណ្ណោះ ។
លោក មឿង សុន ថ្លែងយ៉ាងដូច្នេះ ៖ «ខ្ញុំយល់ថា មិនជារំខានអីសម្រាប់យើងទេ ហើយការបិទហ្នឹងក៏វាមិនមែនជាការរំខានក្នុងការដាក់ប្រាសាទ ព្រះវិហារក្នុងបញ្ជីបេតិកភណ្ឌពិភពលោកទេ ពីព្រោះប្រាសាទព្រះវិហារប្រទេសថៃបានទទួលស្គាល់យើង ៤៦ឆ្នាំមកហើយ គេមិនដែលបដិសេធនឹងសាលដីការបស់តុលាការ ឬក៏តវ៉ាទាមទារប្រាសាទព្រះវិហារថាជារបស់គេ ក៏អត់ដែរ ។ នេះជាសីលធម៌ដ៏ខ្ពង់ខ្ពស់របស់រាជរដ្ឋាភិបាលថៃនិងព្រះមហាក្សត្រថៃ ។ ឯអ្នកដែលធ្វើបាតុកម្មគឺជាតំណាងនៃក្រុមតូចមួយទេ មិនមែនតំណាងនូវសីលធម៌ដ៏ឧត្តុង្គឧត្តមរបស់ប្រជាពលរដ្ឋថៃទេ ។ អ៊ីចឹង ខ្ញុំគិតថា ការដែលគេបិទហ្នឹង គឺរាជរដ្ឋាភិបាលមិនចង់ឲ្យប្រជារាស្ត្រថៃក្រុមតូចដែលខ្វះការ យល់ដឹងអំពីប្រវត្តិសាស្ត្ររឿងតុលាការហ្នឹង ចូលមកអុកឡុករំខានដល់មិត្តភាពយើងទេ ។ នេះជាគំនិតរបស់ខ្ញុំ បើកាលណាមិនបិទទេ អ្នកអស់ហ្នឹង រំខានដល់ក្នុងទឹកដីយើង វាធ្វើឲ្យខូចដល់មិត្តភាព ។ ខ្ញុំយល់ថា ជាការល្អចំពោះសមត្ថកិច្ចរបស់គេៗ ទប់ស្កាត់ មិនមែនមានបំណងមកទប់ស្កាត់សេដ្ឋកិច្ចយើងទេ» ។
លោក មឿង សុន បានមានប្រសាសន៍ថា ការបិទច្រកមួយរយៈនេះ មិនប៉ះពាល់ដល់វិស័យទេសចរណ៍ទេ ហើយការតវ៉ារបស់បាតុករថៃនេះជាការដាស់សតិខ្មែរឲ្យប្រឹងធ្វើ ផ្លូវជាតិងាយស្រួលទៅកាន់ប្រាសាទនោះពីក្នុងទឹកដីខ្មែរឲ្យបាន ឆាប់រហ័សផងដែរ ។
លោក មឿង សុន មានប្រសាសន៍បន្ថែមថា ៖ «ចំណូលនៅក្នុងច្រកហ្នឹង ខ្ញុំយល់ថា វាមិនមែនជាធំដុំណាស់ណាសទេ ទីមួយ ។ ទីពីរ ខ្ញុំមិនជឿថា គេបិទរហូតជារឿងទំនាស់គ្នាទេ គេគ្រាន់តែបិទដោយសារតែវាមានការច្របូកច្របល់ពួកក្រុមតូចមួយដែល មិនយល់ប្រវត្តិសាស្ត្រខ្មែរមិនស្គាល់ប្រវត្តិសាស្ត្រថៃពីរឿង ព្រះវិហារ គាត់មកឆាឆៅ ។ អ៊ីចឹង កាលណាគេបង្ក្រាបផ្ទៃក្នុងបាន គេបើកវិញហើយ» ។
តាមព័ត៌មានពីប៉ូលិសខែត្រព្រះវិហារបានឲ្យដឹងថា នៅថ្ងៃទី២៣ មិថុនានេះ មានប៉ូលិសខែត្រព្រះវិហារមួយក្រុមបានចេញដំណើរទៅមើលសភាពការណ៍បិទ ច្រកចេញចូលប្រាសាទព្រះវិហារនោះផងដែរ ។
ការដាក់ប្រាសាទព្រះវិហារចូលជាបេតិកភណ្ឌពិភពលោកនេះ បានកើតមានជាបញ្ហាចម្រូងចម្រាសជាច្រើន ដូចជា ភាគីថៃទាមទារឲ្យភាគីខ្មែរគូរផែនទីថ្មីនៅតំបន់ប្រាសាទនោះ ដែលសមាជិកគណបក្សប្រឆាំងខាងខ្មែរ បានលើកឡើងថា ជាការខាតបង់របស់ខ្មែរ ព្រោះតុលាការអន្តរជាតិ នៅមុនពេលសម្រេចនោះ គេបានសិក្សាល្អិតល្អន់រួចទៅហើយ ។
មកទល់ពេលនេះ មិនមានបាតុកម្មពីភាគីខ្មែរទាក់ទងជាមួយការតវ៉ារបស់បាតុករថៃទេ តែមានការរៀបចំបុណ្យរំឭកខួបលើកទី៤៦ នៃទិវាដែលតុលាការអន្តរជាតិបានកាត់ក្ដីឲ្យកម្ពុជាឈ្នះប្រទេសថៃ ក្នុងករណីទាមទារប្រាសាទព្រះវិហារ ប៉ុណ្ណោះ ។
កាលពីពេលថ្មីៗនេះ មានការបង្កើតអាជ្ញាធរព្រះវិហារមួយ ដើម្បីទទួលគ្រប់គ្រងនិងទាក់ទងការងារនានាជាមួយប្រាសាទព្រះវិហារនោះ ហើយក្រោយពេលបង្កើត ក៏មានការរៀបចំឲ្យមានកម្លាំងឆ្មាំយាមការពារប្រាសាទព្រះវិហារផងដែរ ៕
2008-06-24
No comments:
Post a Comment