Mr. Som Rainsy and PM. Hun Senប្រតិកម្មនេះបានធ្វើឡើងមួយថ្ងៃក្រោយដែលមានការចេញបញ្ជាឲ្យស៊ើបអង្កេតនោះ ។
ប្រធានគណបក្សប្រឆាំង លោក សម រង្ស៊ី បានមានប្រសាសន៍ប្រតិកម្មតបទៅនឹងរឿងអតីតសកម្មជនគណបក្សសមរង្ស៊ី ម្នាក់ ដែលបានទទួលបញ្ជាឲ្យស្រាវជ្រាវរឿងអតីតកាលទាក់ទងនឹងការរៀបចំបាញ់ ក្បួនរថយន្តរបស់លោកនាយករដ្ឋមន្ត្រី កាលពី១០ឆ្នាំមុន ។
លោក សម រង្ស៊ី បានថ្លែងនៅថ្ងៃនេះថា ប្រសាសន៍ថ្លែងរបស់លោកនាយករដ្ឋមន្ត្រី ហ៊ុន សែន ដែលបញ្ជាឲ្យឈ្មោះ ឡឹក ប៊ុនញាណ សហការជាមួយក្រុមចារកម្មសម្ងាត់យោធារដ្ឋាភិបាល និងមន្ត្រីយោធាជាន់ខ្ពស់ ដើម្បីតាមដានរឿងសង្ស័យថាមានក្រុមភេរវករប៉ុនប៉ងសម្លាប់រូបលោក កាលពីឆ្នាំ១៩៩៨ គឺជារឿងដែលចេះតែប្រឌិត ។
លោក សម រង្ស៊ី បានឲ្យដឹងថា ៖ «ឲ្យទៅសួរលោក សុខ យឿន ទៅ ពីព្រោះតុលាការលោក ហ៊ុន សែនហ្នឹង គឺបានថ្កោលទោលបានសម្រេចចង់ចាប់លោក សុខ យឿន ប៉ុន្តែលោក សុខ យឿន បានទៅរស់នៅប្រទេសហ្វាំងឡង់ ដោយសារតែអង្គការសហប្រជាជាតិ ។ គេដឹងថារឿងនេះជារឿងប្រឌិត រឿងនេះជារឿងដែលគេបង្កើតដើម្បីបង្វែរពីបញ្ហាប្រទេសជាតិពិត ប្រាកដ ។ ដូច្នេះរដ្ឋាភិបាល លោក ហ៊ុន សែន នេះ មិនអាចដោះស្រាយបញ្ហាដីធ្លីមិនអាចដោះស្រាយបញ្ហាទំនិញឡើងថ្លៃ មិនអាចទល់នឹងកំហឹងប្រជារាស្ត្រ មានតែបង្កើតរឿង នឹកឃើញអីចេះតែធ្វើទៅ» ។
សូមជម្រាបថា លោក សុខ យឿន គឺជាសកម្មជនគណបក្សសមរង្ស៊ីម្នាក់ដែលត្រូវតុលាការភ្នំពេញបានចោទ ពីបទទាក់ទងនឹងសកម្មភាពធ្វើភេរវកម្មបាញ់ក្បួនរថយន្តលោកនាយក រដ្ឋមន្ត្រី ហ៊ុន សែន ។ បច្ចុប្បន្នលោក សុខ យឿន កំពុងតែស្ថិតនៅក្នុងប្រទេសហ្វាំងឡង់ ។
កាលពីម្សិលមិញលោកនាយករដ្ឋមន្ត្រី ហ៊ុន សែន ថ្លែងថាលោកបានតែងតាំងលោក ឡឹក ប៊ុនញាណ ជាទីប្រឹក្សាក្រសួងការពារជាតិរួចទៅហើយដើម្បីឲ្យធ្វើកិច្ចការនោះ ។
លោកនាយករដ្ឋមន្ត្រី បានមានប្រសាសន៍ថា ៖ «ប៉ុន្តែ ញាណឯងត្រូវមានភារកិច្ចមួយ ព្រោះអ្វីដែលញាណឯងបានធ្វើនោះ គឺថាពាក់ព័ន្ធជាមួយនឹងបញ្ហាទិដ្ឋភាពភេរវកម្មច្រើនណាស់ ។ ឯកឧត្ដម មាស សុភា ធ្វើការជាមួយ មុល រឿប ហើយ មុល រឿប ហ្នឹង គឺកិច្ចការជាមួយនឹង ញាណ ។ ឯកសារទាំងឡាយមិនមែនគ្រាន់តែប្រកាសតាមទូរទស្សន៍ទេ ព្រោះរឿងនេះវាជ្រាលជ្រៅទាក់ទិនជាមួយនឹងបញ្ហា អាចខាងផ្នែកចារកម្ម ខាងផ្នែកសន្តិសុខរបស់យើងធ្វើកិច្ចការងារនេះឡើងវិញ» ។
លោក សម រង្ស៊ី បានមានប្រសាសន៍ថាលោកមិនដែលបានទាំងស្គាល់លោក ឡឹក ប៊ុនញាណ នោះផង ហើយករណីដែលលោកនាយករដ្ឋមន្ត្រី ហ៊ុន សែន បានមានប្រសាសន៍ថា បញ្ហាជុំវិញរឿងតាមដាននោះមិនបានធ្វើឲ្យលោកព្រួយបារម្ភនោះទេ ។
លោក សម រង្ស៊ី បានបញ្ជាក់ថា ៖ «អត់បារម្ភទាល់តែសោះ អស់សំណើច មានន័យថារដ្ឋាភិបាលសព្វថ្ងៃរបស់លោក ហ៊ុន សែននេះ មិនធ្វើការបម្រើប្រទេសជាតិ មិនដោះស្រាយបញ្ហាដែលប្រជារាស្ត្រចាប់អារម្មណ៍ ដូចជាបញ្ហាដីធ្លី បញ្ហាទំនិញឡើងថ្លៃ មានតែបង្កើតរឿងដែលអត់ប្រយោជន៍ដែលអត់មាននរណាជឿទាល់តែសោះ» ។
ករណីបញ្ជាឲ្យធ្វើការស្រាវជ្រាវរឿងអតីតកាលទាក់ទងនឹងការរៀបចំ បាញ់ក្បួនរថយន្តលោកនាយករដ្ឋមន្ត្រី កាលពី១០ឆ្នាំមុន មិនមានការធ្វើអត្ថាធិប្បាយណាមួយថា នឹងផ្តោតឬក៏នឹងអាចមានជាប់ទាក់ទងនឹងបុគ្គលណាមួយនោះទេ ប៉ុន្តែការបញ្ជានេះបានធ្វើឡើងនៅគ្រាដែលកម្ពុជាកំពុងតែត្រៀមរៀបចំ ដំណើរការបោះឆ្នោតសកល ។
លោក សម រង្ស៊ី បានមានប្រសាសន៍សង្ស័យថា អាចមានបំណងចង់បំបាក់ស្មារតីអ្នកគាំទ្ររបស់លោកនៅមុនការបោះឆ្នោត ប៉ុន្តែលោកជឿថាមិនអាចធ្វើទៅបានដោយជោគជ័យនោះទេ ។
លោក សម រង្ស៊ី បានមានប្រសាសន៍ថា ៖ «បំណងគេដើម្បីចង់បំភិតបំភ័យ គណបក្សសមរង្ស៊ី ប៉ុន្តែគណបក្សសមរង្ស៊ីយល់ឃើញថា រឿងនេះជារឿងអស់សំណើច ធ្វើឲ្យគេយល់ឃើញថាគណបក្សប្រជាជនអន់មែនទែនតែម្ដង» ។
លោកនាយករដ្ឋមន្ត្រីបានមានប្រសាសន៍អះអាងកាលពីម្សិលមិញនោះថា រឿងនោះមិនមែនជាការគំរាមកំហែងនយោបាយណាមួយនោះទេ ប៉ុន្តែគឺជារឿងដែលពាក់ព័ន្ធនឹងគម្រោងចង់ធ្វើឃាតដល់រូបលោក ៕2008-06-16
Radio Free Asia
No comments:
Post a Comment